Liebe Markus
Liebi treui Bsuecherinne und Bsuecher vom «andere gottesdienst»

Mit eusem nächschte «andere gottesdienst» vom 26. Oktober händ mir und eusi Vorgänger eu 71 x unter de Leitig vom Markus dörfe Gedanke-Aastöss mit uf eue Wäg gäh. Mir händ versuecht, en Bezug vom Glaube zu aktuelle Läbessituatione herz’stelle, Muet z’mache, Trost z’spände oder au eifach mal e Stund abschalte z’hälfe.

D’Uusgangslag isch immer en Text, e Bibelstell, es Gebät oder es aktuells Thema gsi. Mir händ im Team eusi Gedanke uustuuscht, Inputs bracht, wieder verworfe. Gägesitigs Vertraue hät dezue gfüehrt, dass mir offe und ohni Hemmige händ dörfe alles aspräche, was eus in Sinn cho isch. Mängmal sind em Markus d’Haar z’Berg gstande, oder er häts lustig gfunde, uf was für en Art mir, gwüssi Sache interpretiert händ – ebe eifach will’s anders gsi sind. Und genau das hät de Gottedienst ebe au anders gmacht. Es isch au immer mal wieder lustig zue und her gange i de Vorbereitig, und mir händ viel dörfe lache.

De Markus isch en Wältmeister, all die Gedanke i gottesdiensttauglichi, iifühlsami und eifach gueti Wort z’fasse. Oft sind mir nach de letschte Sitzig usenand und händ nöd gwüsst, ob das ächt guet chunnt. Dänn händ mir di erscht Version vom Markus übercho und gwüsst: es chunnt guet.

Liebe Markus, mir danked dir – und das dänk ich, wohl au im Name vo allne, wo dä «anderi gottesdienst» bsuecht händ. D’Idee, wo am Afang gstande isch, di viele guete Inputs, dis Gspüri für Situatione, dis Gspüri, was bi de Lüt chönnt guet acho.
Chlammere uf: ich (Marlen) han übrigens im «andere gottesdienst» au glehrt, mal eifach stille z’si – Minute lang, gfühlti Stunde lang.

Es isch e tolli Ziit gsi für eus, und mir werded nöd nur de anderi gottesdienst vermisse, sondern au die Zämekünft mit dir.

Dass du dir zu dim Abschluss namal en «andere gottesdienst» gwünscht häsch, zeigt eus, wie wichtig er au für dich gsi isch.

Mir wünsched dir, und natürlich au de Roswitha vo Herze en wunderbare, gsunde nächste Läbesabschnitt.

Abschlüsse tüend mir mit eme gklaute Uusdruck vo dir sälber. Du häsch immer am Aafang vo jedere Veraastaltig gseit: ‘schön, dass Sie da sind’. Mir säged hüt: ‘Schön, dass Du mit eus da gsi bisch’.